2013 ഏപ്രിൽ ഇരുപത്തി ഒൻപതാം തീയതി പരിശുദ്ധ മാർപാപ്പ , നടപടി  14 : 5 - 18 , യോഹന്നാൻ  14 : 21 - 26 എന്നീ വേദവായനകൾക്കു നൽകിയ സന്ദേശം 

                എളിമയുള്ളവരുടെ സത്ഗുണമാണ് പാപത്തെക്കുറിച്ചു ലജ്ജിക്കുക . കാരണം , അത് ദൈവത്തിന്റെ ക്ഷമ സ്വീകരിക്കാൻ അവരെ ഒരുക്കുന്നു. “ദൈവം പ്രകാശമാണ്, അവനിൽ അന്ധകാരമില്ല” എന്നെഴുതിയിരിക്കുന്ന യോഹന്നാന്റെ ആദ്യ ലേഖനം “നമ്മുടെ എല്ലാവരുടെയും ജീവിതത്തിൽ അന്ധകാരമുണ്ട്” എന്ന് ചിന്തിക്കാൻ നമ്മെ പ്രേരിപ്പിക്കുന്നു . എല്ലാത്തിലും , നമ്മുടെ മനഃസാക്ഷിയിൽ പോലും ,അന്ധകാരമുണ്ട് . ഇതിനർത്ഥം നാം അന്ധകാരത്തിൽ നടക്കുന്നു എന്നല്ല .

                 നാം നമ്മിൽ തന്നെ സംതൃപ്തി കണ്ടെത്തുകയും നമ്മുക്ക് രക്ഷയുടെ ആവശ്യമില്ല എന്ന് വിചാരിക്കുകയും ചെയ്യുന്നതിനെയാണ് ‘അന്ധകാരത്തിൽ നടക്കുക’ എന്ന് പറയുന്നത് . അതാണ് അന്ധകാരം . 

                 അന്ധകാരത്തിന്റെ പാതയിൽ നടക്കാൻ തുടങ്ങിയാൽ ഒരു തിരിച്ചു പോക്ക് എളുപ്പമല്ല . ഇതുകൊണ്ടാണ് യോഹന്നാൻ ഇങ്ങനെ തുടർന്ന് പറയുന്നത് “നമ്മിൽ പാപം ഇല്ലെന്നു പറഞ്ഞാൽ നാം നമ്മെത്തന്നെ വഞ്ചിക്കുകയാണ്” . നമ്മിൽ സത്യം ഇല്ല . നിങ്ങളുടെ പാപങ്ങളെ നോക്കുക . നമ്മുടെ പാപങ്ങളെ നോക്കുക നാം എല്ലാവരും പാപികളാണ് ,എല്ലാവരും ….ഇവിടെ നിന്നാണ് നാം തിരിയുന്നത് . നാം നമ്മുടെ പാപങ്ങൾ ഏറ്റു പറഞ്ഞാൽ , അവൻ വിശ്വസ്തനായതിനാൽ , അവന്റെ നീതിയിൽ അവൻ നമ്മുടെ പാപങ്ങൾ ക്ഷമിക്കുകയും എല്ലാ തിന്മകളിൽ നിന്നും നമ്മെ ശുദ്ധീകരിക്കുകയും ചെയ്യും .

                   നന്മയായ , വിശ്വസ്തനായ, നീതിയുള്ളവനാകയാൽ ക്ഷമിക്കുന്നവനായ കർത്താവിനെയാണ് അദ്ദേഹം നമ്മുടെ മുമ്പിൽ അവതരിപ്പിക്കുന്നത് .അല്ലേ ? കർത്താവു നമ്മോടു ക്ഷമിക്കുമ്പോൾ അവൻ നീതി പ്രവർത്തിക്കുന്നു . തന്നോടുതന്നെ അവൻ നീതി ചെയ്യുന്നു . അതാണ് ആദ്യം . കാരണം , ക്ഷമിക്കാനും രക്ഷിക്കാനുമാണ് അവൻ വന്നത് .മക്കളോട് വാത്സല്യം കാണിക്കുന്ന പിതാവിനെപ്പോലെ നമ്മെ ക്ഷണിക്കാനും സ്വാഗതം ചെയ്യാനുമാണ് അവൻ വന്നത് . തന്നെ ഭയപ്പെടുന്നവർക്കു കർത്താവു വാത്സല്യമാണ് . വാത്സല്യമായതിനാൽ അവൻ എപ്പോഴും നമ്മെ മനസിലാക്കുന്നു . അവനിൽ നിന്ന് മാത്രം വരുന്ന സമാധാനം നമ്മുക്ക് നല്കാൻ അവൻ ആഗ്രഹിക്കുന്നു . 

                     നമ്മുടെ വസ്ത്രത്തിലെ അഴുക്കു കഴുകിക്കളയാൻ അലക്കുകാരന്റെ അടുക്കൽ പോകുന്നതു പോലെയാണ് കുമ്പസാരക്കൂടിനെ സമീപിക്കുന്നത് എന്ന് തോന്നിയാലും , വാസ്തവത്തിൽ ഇതാണ്  അനുരഞ്ജന കൂദാശയിൽ സംഭവിക്കുന്നത് : കുമ്പസാരക്കൂട്ടിലെ യേശു അലക്കുകാരനല്ല , യേശുവുമായുള്ള കൂടിക്കാഴ്ചയാണ് അവിടെ നടക്കുന്നത് . നമുക്കുവേണ്ടി കാത്തിരിക്കുന്ന , നാം ആയിരിക്കുന്നതുപോലെ നമ്മെ സ്വീകരിക്കാൻ കാത്തിരിക്കുന്ന യേശുവുമായുള്ള കൂടിക്കാഴ്ച . “പക്ഷെ കർത്താവേ ,കേട്ടാലും ഞാൻ ഇങ്ങനെയാണ് …..” സത്യം പറയാൻ  നമ്മുക്ക് ലജ്ജയണ് : “ ഞാൻ ഇത് ചെയ്തിട്ടുണ്ട് , ഞാൻ ഇങ്ങനെ ചിന്തിച്ചിട്ടുണ്ട് .” ലജ്ജ പക്ഷേ , ക്രൈസ്തവ പുണ്യമാണ്  .മാനുഷിക  പുണ്യവുമാണത് ….. നാണിക്കാൻ കഴിയുക മാനുഷികമാണ്. നിങ്ങൾ  ഇറ്റാലിയൻ ഭാഷയിൽ എന്താണ് പറയുക എന്നെനിക്കറിയില്ല  . ഞാൻ വരുന്ന സംസ്കൃതിയിൽ ലജ്ജിക്കാനറിയാത്തവനെ ‘നാണംകെട്ടവൻ’ എന്നാണ് വിളിക്കുക . തന്നെക്കുറിച്ചു ലജ്ജിക്കാനറിയാത്തവൻ നാണമില്ലാത്തവനാണ്. എളിമയുള്ള ഹൃദയത്തിന്റെ സദ്‌ഗുണമാണ് സ്വയം ലജ്ജിക്കാൻ കഴിയുക. വിനയമുള്ള സ്ത്രീകൾക്കും പുരുഷന്മാർക്കും പറഞ്ഞിട്ടുള്ള ഗുണമാണത് . 

                     നമ്മുക്ക് വിശ്വാസം വേണം . നാം പാപം ചെയ്യുമ്പോൾ നമുക്കുവേണ്ടി പിതാവിന് മുമ്പിൽ വാദിക്കാൻ നമ്മുക്കൊരാളുണ്ട് : നീതിമാനായ  യേശുക്രിസ്തു. അവൻ പിതാവിന് മുമ്പിൽ നമ്മെ പിന്താങ്ങി സംസാരിക്കുന്നു . നമ്മെ നീതിമത്കരിച്ചു സംസാരിക്കുന്നു . കാരണം , അവനു നമ്മുടെ ബലഹീനതകൾ അറിയാം . എന്നാൽ , നാം പാപികളാണ് എന്ന സത്യം അംഗീകരിച്ചു കൊണ്ട് നമ്മെത്തന്നെ കർത്താവിന്റെ കരങ്ങളിൽ എടുത്തുവയ്ക്കണം . വിശ്വാസത്തോടെ , ആശയ ബോധത്തോടെ , ആനന്ദത്തോടെ എടുത്തുവയ്ക്കണം . കപട വേഷത്തിൽ മറച്ചുവയ്ക്കാതെ , പാപികളാണെന്ന യാഥാർത്ഥ്യം    മറച്ചുവയ്ക്കാതെ എടുത്തുവയ്ക്കണം …..  ദൈവത്തിന് മുമ്പിൽ നമ്മൾ പ്രച്ഛന്ന വേഷം കെട്ടാൻ തുനിയരുത് ! ലജ്ജ ഒരു പുണ്യമാണ് .അനുഗ്രഹീത പുണ്യം ! ഈ ഗുണമാണ് യേശു നമ്മിൽനിന്ന് ആവശ്യപ്പെടുന്നത്: എളിമയും ശാന്ത ശീലവും .  എളിമയും സൗമ്യതയും ക്രിസ്തീയ ജീവിതത്തിന്റെ മൂലക്കല്ലാണ് . എളിമയിലും ശാന്തശീലത്തിലുമാണ് ക്രിസ്ത്യാനി കുമ്പസാരക്കൂടിനെ സമീപിക്കുന്നത് . നമ്മോടു ക്ഷമിക്കാനായി യേശു അവിടെ കാത്തിരിക്കുന്നു . നമ്മുക്ക് അവനോട് ചോദ്യം ഉന്നയിക്കാം : 

                   കുമ്പസരിക്കാൻ പോകുന്നത് പീഡന ക്ലാസ്സിലേക്ക് പോകുന്നത് പോലെയല്ലേ ? അല്ല ! ദൈവത്തെ സ്തുതിക്കാനാണ് കുമ്പസാരക്കൂട്ടിൽ പോകുന്നത് . കാരണം , എന്നെ ,പാപിയായ എന്നെ അവൻ രക്ഷിച്ചിരിക്കുന്നു . അവൻ എന്നെ തല്ലാനാണോ കുമ്പസാരക്കൂട്ടിൽ കാത്തിരിക്കുന്നത് ? അല്ല . വാത്സല്യത്തോടെ എന്നോട് ക്ഷമിക്കാൻ അവൻ കാത്തിരിക്കുന്നു . ഞാൻ നാളെ ഇതേ തെറ്റുകൾ ആവർത്തിച്ചാൽ…..?  വീണ്ടും കുമ്പസാരക്കൂട്ടിലേക്ക് പോവുക . പോവുക .പിന്നെയും പോവുക ….. അവൻ എപ്പോഴും നമ്മെ കാത്തിരിക്കുന്നു . ദൈവത്തിന്റെ ഈ വാത്സല്യം , ഈ എളിമ , ഈ സൗമ്യ ഭാവം ….. ദൈവത്തിലുള്ള ഈ ആശ്രയബോധമാണ് ശ്വസിക്കാൻ (ആശ്വസിക്കാൻ ) നമ്മെ സഹായിക്കുന്നത് .  കർത്താവ് ഈ കൃപ നമ്മുക്ക് നൽകട്ടെ . കാരണം , സത്യം പ്രകാശമാണ് . അർദ്ധ - സത്യത്തിന്റെ അന്ധകാരമോ നുണകളുടെ രാത്രിയോ  എന്റെ കൂടെ ഉണ്ടാകാതിരിക്കട്ടെ , ഞാൻ കർത്താവിനെ സമീപിക്കുമ്പോൾ , അവൻ ഈ കൃപ നമ്മുക്ക് നൽകട്ടെ .

for more details : https://www.youtube.com/watch?v=jSQ2q92UF94&list=PLaUtZ3dvlFuaqWbVWwEDwQstxTQKRbYWf&index=26