2013 മെയ്  രണ്ടാം  തീയതി പരിശുദ്ധ മാർപാപ്പ , നടപടി 15 : 7 - 21 ,  യോഹന്നാൻ 15 : 9 - 11  എന്നീ വേദവായനകൾക്കു നൽകിയ സന്ദേശം.

                    ക്രിസ്തുവിന്റെ സ്നേഹത്തിൽ നിന്ന് പിറന്നു വീണതിനാൽ സഭ എന്നും “അതെ” എന്ന് പറയുന്ന സമൂഹമാണ് . പ്രവർത്തിക്കാൻ  പരിശുദ്ധാന്മാവിനെ  ക്രിസ്ത്യാനികൾ അനുവദിക്കാത്തപ്പോൾ സഭയിൽ വിഭാഗീയതയും വിഭജനങ്ങളും ഉടലെടുക്കുന്നു . പെന്തക്കുസ്തയ്ക്കുശേഷം , സഭ സ്വീകരിച്ച ആദ്യത്തെ ചുവടുവയ്പ്പിനെക്കുറിച്ചു നമ്മുക്ക് ചിന്തിക്കാം . സുവിശേഷം പ്രഘോഷിക്കാനായി “വിശ്വത്തിന്റെ അതിരുകളിലേക്കും പ്രാന്തപ്രദേശത്തേക്കും” അവർ പോയി . പരിശുദ്ധാന്മാവ് രണ്ടു കാര്യങ്ങൾ ചെയ്യുന്നു : ആദ്യം അവൻ ‘പിന്നിൽ നിന്ന് ഉന്തുന്നു ‘ അതിനായി , ചില പ്രശ്നങ്ങളുണ്ടാക്കുന്നു. പിന്നെ സഭയിൽ ലയം സൃഷ്ടിക്കുന്നു . പുറജാതിക്കാരെ പ്രവേശിപ്പിക്കുന്നതിനെക്കുറിച്ചു ജറുസലേമിൽ , ശിഷ്യന്മാരുടെയിടയിൽ ,നിരവധി അഭിപ്രായങ്ങളുണ്ടായിരുന്നു . ചിലർ പറഞ്ഞു അവരെ പ്രവേശിപ്പിക്കേണ്ട , മറ്റു ചിലർ തുറന്ന മനസുള്ളവരായിരുന്നു . ‘വേണ്ട അരുത്’ എന്ന് പറഞ്ഞ ഒരു സഭയുണ്ടായിരുന്നു. നമ്മുക്ക് കഴിയില്ല . ഇല്ല . ഇല്ല . “വേണം ,അതെ” എന്ന് പറഞ്ഞ സഭയും ഉണ്ടായിരുന്നു ‘ വേണം , എന്നാൽ…. നമ്മുക്ക് അതേക്കുറിച്ചു ചിന്തിക്കാം , നമ്മുക്ക് നമ്മെ തന്നെ തുറക്കാം , നമ്മുക്കായി വാതിൽ തുറക്കുന്ന ആത്മാവുണ്ടല്ലോ’ എന്നും ചിലർ പറഞ്ഞു. തന്റെ പ്രവർത്തനത്തിന്റെ രണ്ടാം ഭാഗം പരിശുദ്ധാന്മാവു ചെയ്യണമായിരുന്നു : ഈ വ്യത്യസ്ത നിലപാടുകളിൽ നിന്നു യോജിപ്പിലെത്തുന്ന തീരുമാനം , സഭയിൽ ഐക്യതയും ലയവും സൃഷ്ടിക്കുക ; ജറുസലേമിലുള്ളവരും പുറജാതിക്കാരും തമ്മിൽ യോജിപ്പ് . ചരിത്രത്തിൽ എന്നും പരിശുദ്ധാന്മാവു ചെയ്യുന്ന പ്രവർത്തനം വിസ്മയം തന്നെയാണ് . പ്രവർത്തിക്കാൻ അവനെ അനുവദിക്കാത്തപ്പോൾ സഭയിൽ വിഭജനങ്ങൾ തലപൊക്കുന്നു . വിഭാഗീയത ഉണ്ടാകുന്നു . കാരണം , ആത്മാവിന്റെ സത്യത്തിനു നാം നമ്മെത്തന്നെ തുറക്കുന്നില്ല . നമ്മുടെ ഹൃദയം അടച്ചുവച്ചിരിക്കുകയാണ് .

                   സഭയുടെ ആരംഭ കാലത്തുണ്ടായ ഈ തർക്കത്തിൽ താക്കോൽ വചനം എന്താണ് ? ജറുസലേമിലെ മെത്രാനായിരുന്ന യാക്കോബിന്റെ വാക്കുകൾ നമ്മുക്ക് കേൾക്കാം : “ പിതാക്കന്മാർക്ക് സ്വയം വഹിക്കാൻ പറ്റാതിരുന്ന നുകം ശിഷ്യന്മാരുടെ കഴുത്തിൽ എടുത്തു വയ്ക്കാൻ നാം നിർബന്ധിക്കരുത്”. കർത്താവിനെ ശുശ്രൂഷിക്കുന്നത് വലിയൊരു ഭാരമാകുമ്പോൾ , വഹിക്കാൻ പറ്റാത്ത നുകമാകുമ്പോൾ , ക്രൈസ്തവ സമൂഹങ്ങളുടെ വാതിലുകൾ അടഞ്ഞു കിടക്കുന്നു . ആർക്കും കർത്താവിലേക്കു വരാൻ തോന്നില്ല . കർത്താവായ യേശുവിന്റെ കൃപയാൽ രക്ഷിക്കപ്പെട്ടവരാണ് നാം എന്നല്ലേ നാം വിശ്വസിക്കുന്നത് . ഈ കൃപ പ്രഘോഷിക്കുന്ന സിദ്ധിയുടെ ആനന്ദം ,അതാണ് ആദ്യം . പിന്നെ എന്ത് ചെയ്യണമെന്ന് നമ്മുക്ക് കാണാം .”നുകം” എന്ന ഈ വാക്ക് എന്റെ ഹൃദയത്തിലേക്ക് വരുന്നു , എന്റെ മനസ്സിലേക്ക് വരുന്നു . നുകം വഹിക്കുക എന്നതിന് ഇന്ന് സഭയിൽ എന്താണ് അർത്ഥം ? അവന്റെ സ്നേഹത്തിൽ നിലനിൽക്കാൻ യേശു ആവശ്യപെടുന്നു . ഈ സ്നേഹത്തിൽ നിന്നാണ് കല്പനകൾ അനുസരിക്കുക എന്ന കാര്യം ജനിക്കുന്നത് . ക്രിസ്തുവിന്റെ സ്നേഹത്തിൽ നിലനിൽക്കുന്ന സമൂഹം കൊടുക്കുന്ന ‘അതെ’ ആണ് ആ കല്പനകൾ . ആ ‘അതെ’ അവിടെയുള്ളത് കൊണ്ട് ചിലപ്പോൾ ‘അല്ല’ എന്നും നാം പറയുന്നു . ഈ സ്നേഹമാണ് കർത്താവിനോടുള്ള വിശ്വസ്തതയിലേക്കു നയിക്കുന്നത് ….. “ഞാൻ കർത്താവിനെ സ്നേഹിക്കുന്നതുകൊണ്ട് ഇത് ഞാൻ ചെയ്തില്ല . അത് ഞാൻ ചെയ്തില്ല” . ‘അതെ’ പറയുന്ന സമൂഹമാണ് സഭ . ആ ‘അതേ’യുടെ പരിണിതഫലമാണ് ‘അല്ല’ , ‘ഇല്ല’ എന്നത് . കർത്താവിനോട് ഞാൻ ‘അതെ’ പറഞ്ഞിട്ടുള്ളത് കൊണ്ട് കർത്താവിന് ഇഷ്ടമില്ലാത്ത കാര്യങ്ങളോട് ‘ഇല്ല’ , ‘അല്ല’, “ അത് ഞാൻ ചെയ്യില്ല” എന്ന് പറയുന്നു . സ്നേഹത്തിന്റെ സമൂഹമാകാൻ , യേശുവിനോടുള്ള  സ്നേഹത്തിന്റെ സമൂഹമാകാൻ , നമ്മെ സ്നേഹിച്ചവന്റെ  സമൂഹമാകാൻ, നമ്മുക്ക് പരിശുദ്ധാന്മാവിനോട് കൃപയ്ക്കായി പ്രാർത്ഥിക്കാം . 

                     ‘അതെ’ പറയുന്ന  സമൂഹമാകാൻ . ഈ ‘അതെ’ കല്പനകൾ അനുസരിക്കാൻ നമ്മെ പ്രേരിപ്പിക്കട്ടെ  . ഇത് തുറന്നിട്ട വാതിലുകളുള്ള സമൂഹമാണ്. നിയമാനുസരണം മാത്രം എന്ന പ്രലോഭനത്തിൽ നിന്ന് കർത്താവു നമ്മെ രക്ഷിക്കട്ടെ . സുവിശേഷത്തിനുപകരം നിൽക്കുന്ന നിയമാനുസരണം ഒരു പ്രലോഭനമാണ് . അത് അരുതുകളുടെ  പ്രലോഭനമാണ് .കാരണം , യേശു ആദ്യം അന്വേഷിക്കുന്നത് സ്നേഹമാണ് , അവനോടുള്ള സ്നേഹം , അവന്റെ സ്നേഹത്തിൽ നിലനിൽക്കാനുള്ള ക്ഷണം . ക്രിസ്തീയ സമൂഹം സ്നേഹത്തിൽ ജീവിക്കുമ്പോൾ അത് അതിന്റെ പാപങ്ങൾ ഏറ്റു പറയുന്നു . കർത്താവിനെ ആരാധിക്കുന്നു . മറ്റുള്ളവരുടെ തെറ്റുകൾ ക്ഷമിക്കുന്നു . മറ്റുള്ളവരോട് ഉപവിയോടെ പെരുമാറുന്നു . മറ്റുള്ളവരെ സ്നേഹിക്കുന്നു . സ്നേഹം പ്രകടിപ്പിക്കുന്നു . അപ്പോൾ കർത്താവിനോട് കൂറ് പുലർത്താനും കല്പനകൾ അനുസരിക്കാനും ബാധ്യതയുണ്ടെന്നു ബോധ്യപ്പെടുന്നു. 

കൂടുതൽ വിവരങ്ങൾക്ക് സന്ദർശിക്കുക : https://www.youtube.com/watch?v=3I83OfGBSD0&list=PLaUtZ3dvlFuaqWbVWwEDwQstxTQKRbYWf&index=29